دِل ڈھونڈتا ہے پھر وہی فُرصت کے رات دن

جاڑوں کی نرم دھوپ اور آنگن میں لیٹ کر
آنکھوں پہ کھینچ کر ترے آنچل کے سائے کو
اوندھے پڑے رہیں، کبھی کروٹ لئے ہوئے
یا گرمیوں کی رات کو پُروائی جب چلے
بستر پہ لیٹے دیر تلک جاگتے رہیں
تاروں کو دیکھتے رہیں چھت پر پڑے ہوئے
برفیلے موسموں کی کسی سرد رات میں
جا کر اسی پہاڑ کے پہلو میں بیٹھ کر
وادی میں گونجتی ہوئی خاموشیاں سنیں
دِل ڈھونڈتا ہے پھر وہی فُرصت کے رات دن

گلزار

 کون آئے گا!

شب بھر گرتے پتوں کی آوازیں مجھ سے کہتی ہیں

کون آئے گا!

کس کی آہٹ پر مٹی کے کان لگے ہیں!

خوشبو کس کو ڈھونڈ رہی ہے!

شبنم کا آشوب سمجھ

اور دیکھ کہ ان پھولوں کی آنکھیں

کس کا رستہ دیکھ رہی ہیں

کس کی خاطر

قریہ قریہ جاگ رہا ہے

سونا رستہ گونج رہا ہے

کس کی خاطر!!

تنہائی کے ہول نگر میں

شب بھر گرتے پتوں کی آوازیں چنتا رہتا ہوں

اپنے سر پر تیز ہوا کے نوحے سنتا رہتا ہوں

امجد سلام امجد

 کوئی خاموش پنچھی اپنے دل میں

امیدوں کے سنہرے جال بُن کے
اڑا جاتا ہے چگنے دانے دُنکے
فضاۓ زندگی کی آندھیوں سے
ہے ہر اک کو بہ چشمِ تر گزرنا
اسے اڑ کر ، مجھے چل کر گزرنا

مجید امجد

 جو دن کبھی نہیں بیتا وہ دن کب آئے گا

انہی دنوں میں اس اِک دن کو کون دیکھے گا

میں روز ادھر سے گزرتا ہوں کون دیکھتا ہے
میں جب ادھر سے نہ گزروں گا کون دیکھے گا

ہزار چہرے خود آرا ہیں کون جھانکے گا
مرے نہ ہونے کی ہونی کو کون دیکھے گا

تڑخ کے گرد کی تہ سے اگر کچھ پھول
کھلے بھی، کوئی تو دیکھے گا کون دیکھے گا

(مجید امجد)

 ابھی ابھی سبز کھیتوں پر

جو دور تک مست آرزوؤں کی موج بن کر لہک رہی ہیں
سیاہ بادل جھکے ہوئے تھے
اور اب، حسین دھوپ میں نہاتی فضائیں زلفیں چھٹک رہی ہیں

طویل پٹڑی کے ساتھ رقصاں
مہیب پیڑوں کے گونچتے جُھنڈ!
دراز سایوں سے بچتی راہیں
کہ جن کی موہوم سرحدوں پر
نکل کے گاڑی کی کھڑکیوں سے،
تری نگاہیں مری نگاہیں
الگ الگ آکے تھم گئی ہیں

مجید امجد

احمد راہی

دوست مایوس نہ ہو
سلسلے بنتے بگڑتے ہی رہے ہیں آخر
تیری پلکوں پہ سر اشکوں کے ستارے کیسے
تجھ کو غم ہے تیری محبوب تجھے مل نہ سکی
اور جو زیست تراشی تھی ترے خوابوں نے
آج وہ ٹھوس حقائق میں کہیں کھو گئی
تجھ کو معلوم ہے میں نے بھی محبت کی تھی
اور انجام محبت بھی ہے معلوم تجھ کو
انگنت لوگ زمانے میں رہے ہیں ناکام
تیری ناکامی نئی بات نہیں دوست مرے
کس نے پائی ہے بھلا زیست کی تلخی سے نجات
چار وناچار یہ زہر اب سبھی پیتے ہیں
جاں سپاری کے فر یبندہ فسانے پہ نہ جا
کون مرتا ہے محبت میں سبھی جیتے ہیں
وقت ہر زخم کو ، ہر غم کو مٹا دیتا ہے 
وقت کے ساتھ یہ صدمہ بھی گزر جائیگا
اور جو باتیں دہرائی ہیں میں نے اس وقت 
تو بھی اک روز انہی باتوں کو دہرائے گا
دوست مایوس نہ ہو!
سلسلے بنتے بگڑتے ہی ریے ہیں آخر

نامعلوم

میں نے چاہا اسے بھول جاؤں 

فراموش کر دوں وہ سب روزو شب

اس کو دیکھوں تو یوں کہ واقف نہیں

میں بھی اب اس کی طرح  کسی اور کو ساتھ لے کر چلو
ہر گھڑی خوش رہوں مسکراتا پھروں بے وجہ بلا سبب 

جب ہوا کے قدم مثل مے نوش

بے ڈھب سے پڑنے لگیں

چاندنی کھڑکیوں سے پکاڑے اگر

نگائیں چمکنے لگیں

آہٹیں کانوں میں سرگوشیاں کرکے چلنے لگیں

دست موسم کی ایجاد سے پیرہن

زرد پتے بدلنے لگیں

بخت خوابیدہ گلناز آنکھیں ملنے لگے

کاش یوں ہو

تب اس کو دیکھوں

تو وہ اجنبی سا لگے

اس کی آہٹ پر خواہشوں کے گل نہ کھلیں اور وہ پکاڑے اگر

تو اس کی آواز پر کان تک نہ دھروں

عہد رفتہ کی ہر آواز کو بھول کر

آنے والی رتوں کا سواگت کروں

اس کے چہرے کو چہروں کے اندھیروں میں اس طرح گم کروں
 نہ وہ آنکھیں رہیں نہ وہ گیسو نہ وہ رت

میں نے چاہا اسے بھول جاؤں 

فراموش کردوں سب مگر۔۔۔۔۔۔